ٹی وی شو کے دوران قادر مندوخیل کو طمانچہ، فردوس عاشق کا اپنے دفاع میں قدم اٹھانے کا دعویٰ

معاون خصوصی پنجاب ڈاکٹر فردوس عاشق اعوان ایک مرتبہ پھر خبروں کی زینت بنی ہوئی ہیں۔ اس بار انہوں نے کسی کو ڈانٹا نہیں بلکہ براہِ راست طمانچہ رسید کیا۔

مقامی ٹی وی چینل ایکسپریس نیوز سے بدھ کی شب نشر ہونے والے پروگرام ‘کل تک’ میں فردوس عاشق اعوان کے ساتھ پیپلز پارٹی کے رکنِ قومی اسمبلی قادر خان مندوخیل شریک تھے۔

پروگرام کی ایک ویڈیو سوشل میڈیا پر لیک ہوئی ہے جس میں فردوس عاشق اعوان کو مبینہ طور پر نازیبا زبان استعمال کرتے ہوئے، قادر خان مندوخیل کو طمانچہ مارتے اور ان پر حملہ کرتے ہوئے دیکھا جا سکتا ہے۔

ویڈیو کے مطابق پروگرام کے دوران قادر مندوخیل نے فردوس عاشق اعوان کو کرپٹ کہا، جس پر وہ طیش میں آگئیں اور تلخ کلامی کے بعد انہوں نے مندوخیل کا گریبان پکڑ لیا۔

پروگرام میں بدمزگی پیدا ہونے کے بعد پروگرام کے میزبان جاوید چوہدری کو اپنی نشست پر کھڑے ہوئے دیکھا جا سکتا ہے جو یہ کہہ رہے ہیں کہ میڈم کیا ہو گیا ہے۔

دونوں سیاست دانوں کے درمیان یہ جھگڑا اس وقت ہوا جب پروگرام کے دوران وقفہ تھا اور وقفے کے دوران ریکارڈ ہونے والی اس ویڈیو کے بارے میں یہ واضح نہیں ہے کہ یہ کس نے لیک کی ہے۔

البتہ جھگڑے کی یہ ویڈیو سوشل میڈیا پر وائرل ہے اور پاکستان میں ٹوئٹر پر ہیش ٹیگ ‘فردوس عاشق اعوان’ ٹاپ ٹرینڈ کر رہا ہے۔

معاون خصوصی پنجاب نے اپنے ایک وضاحتی بیان میں دعویٰ کیا ہے کہ قادر خان مندوخیل نے انہیں دھمکیاں دیں، اور مبینہ طور پر، بدزبانی کرتے ہوئے ان کے مرحوم والد اور انہیں گالیاں دیں۔

فردوس عاشق کے بقول، انہیں اپنے دفاع میں انتہائی قدم اٹھانا پڑا، کیوں کہ، ان کے الفاظ میں، میری سیاسی ساکھ اور عزت داؤ پر لگ گئی تھی۔

Effects of political polarisation making a show of the show. pic.twitter.com/7r4LPSnzhz

— Arshad Sharif (@arsched) June 9, 2021

بعض ٹوئٹر صارفین پروگرام کے میزبان پر بھی تنقید کرتے ہوئے کہتے ہیں کہ میزبان کو جھگڑے کے دوران مداخلت کرنا چاہیے تھی اور وہ اس کے برابر کے شریک ہیں۔