رحیم یارخان چیمبرسالانہ الیکشن میں فاؤنڈرز گروپ نے اپنی پوزیشن مستحکم کرلی

رحیم یارخان;19ستمبرکو رحیم یارخان چیمبرسالانہ الیکشن میں فاؤنڈرز گروپ نے اپنی پوزیشن مستحکم کرلی‘ گروپ کے سرپرست اعلیٰ حاجی محمدابراہیم کی جانب سے مقامی فلور ملز میں ہفتہ اور اتوار کی درمیانی شب کارپوریٹ کلاس اور ایسوسی ایٹ کلاس سے تعلق رکھنے والے چیمبر کے ممبران کے اعزاز میں عشائیہ دیاگیا

جس میں ایک ہزار کے لگ بھگ چیمبر کے ممبران اور ضلع کی بزنس کمیونٹی کی سرکردہ شخصیات نے شرکت کرتے ہوئے فاؤنڈرز گروپ پر بھرپور اعتماد کا اظہار کیا اور گروپ کے امیدواروں کی حمایت کی یقین دہانی کرائی۔

شرکاء سے خطاب کرتے ہوئے حاجی محمدابراہیم نے کہا کہ رحیم یارخان چیمبر کے قیام کے بعد روز اول سے فاؤنڈرز گروپ کی یہ خواہش اورتمنا رہی ہے کہ بزنس کمیونٹی ہرقسم کی گروہ بندیوں اورتعصبات سے بالاتر ہوکر افہام وتفہیم سے چیمبر کا انتظام وانصرام چلائے۔

ہمارے بڑوں نے چیمبر میں جاری سالہا سال کی سیاسی کشاکش اور گروہ بندی کے خاتمے کیلئے دونوں گروپوں کو برابری کی بنیاد پر شراکت اقتدار کے فارمولے پر متفق کیا اور طے پایا کہ دونوں گروپ ایک ایک سال چیمبر کی باگ ڈور سنبھالتے ہوئے بزنس کمیونٹی کی خدمت کریں گے۔

لیکن نہایت افسوس کے ساتھ کہنا پڑ رہا ہے کہ مخالف فریق نے عہدوپیماں کے باوجود ایفائے عہد کی ذمہ داری پوری نہیں کی اور موقع پرستی کا مظاہرہ کرتے ہوئے دھوکہ دہی کے ساتھ چیمبر پر قابض ہوکر اپنے اقتدار کو طول دینے لگے ہیں۔لیکن برسراقتدار گروپ کی نااہلی اور مفاد پرستی کے باعث رحیم یارخان چیمبر جیسا ادارہ اپنی افادیت اور اہمیت کھوچکا ہے۔ موجودہ حالات میں فاؤنڈرز گروپ نے سوچ بچار کے بعد نئے عزم اور ولولے کے ساتھ چیمبر کے انتخابات میں بھرپور حصہ لینے کا فیصلہ کیا ہے اور اب مخالفین کیلئے میدان کھلا نہیں چھوڑا جائے گا۔

حاجی محمدابراہیم نے شرکاء کو رحیم یارخان چیمبر میں فاؤنڈرز گروپ کے ابتدائی سالوں کی خدمات اور کارکردگی بارے بھی تفصیل سے آگاہ کیا اوراپیل کی کہ چیمبر کے ممبران 19ستمبر کو فاؤنڈرز گروپ کے کارپوریٹ اور ایسوسی ایٹ کلاسز کے پورے پینل کو کامیاب کرائیں۔سابق ایم این اے میاں امتیاز احمد اور سابق ایم پی اے چوہدری محمود الحسن چیمہ نے اپنے خطاب میں کہا کہ اس وقت ملکی معیشت کا بیڑہ غرق ہوچکا ہے اور صنعتی وکاروباری برادری بدترین مشکلات اور مسائل کا شکار ہے۔ موجودہ حکومت ہرمحاذ پر ناکام ہوچکی ہے۔

انہوں نے کہا کہ اس وقت رحیم یارخان چیمبر میں بھی مفاد پرست ٹولہ قابض ہے‘ رحیم یارخان کی بزنس کمیونٹی کو اپنے اور چیمبر کے وسیع تر اجتماعی مفادمیں اتحاد کا مظاہرہ کرتے ہوئے چیمبر میں حقیقی قیادت کوسامنے لانا چاہیے جو فاؤنڈرز گروپ کی صورت میں ان کے پاس موجود ہے۔ فاؤنڈرزگروپ کے رہنماؤں میاں اعجازعامر‘ سابق صدر چیمبر میاں محمدامتیازاحمد‘ چوہدری خالد رفیق‘ حاجی مقبول بھٹی‘عبدالوحیدبھٹی نے خطاب کرتے ہوئے کہا کہ ماضی میں فاؤنڈرز گروپ کوجب جب موقع ملا اس نے چیمبر کے ممبران اور ضلع کی بزنس کمیونٹی کی توقعات پر پورا اترتے ہوئے بے مثال کامیابیاں حاصل کیں۔

چیمبر سیکرٹریٹ کی بلڈنگ‘ رحیم یارخان میں انڈسٹریل اسٹیٹ کا قیام اور دوسرے کئی ایک اقدامات فاؤنڈرز گروپ کی شاندار کارکردگی کی روشن مثالیں ہیں۔ انہوں نے کہا کہ گذشتہ چند سال سے رحیم یارخان چیمبر کی بلڈنگ بزنس کمیونٹی کا ادارہ نہیں بلکہ ایک مخصوص ٹولے کا ذاتی کلب بن کررہ گئی ہے۔

چیمبر کے ممبران کی اہمیت اور حیثیت ختم ہوچکی ہے‘ فاؤنڈرز گروپ ممبران کے وقار کوبحال اور چیمبر سیکرٹریٹ کوایک بار پھر بزنس کمیونٹی کی مثبت وکارآمد سرگرمیوں کا گہوارہ بنائے گا۔ تقریب میں اسٹیج سیکرٹری کے فرائض چیمبر کی ایگزیکٹو کمیٹی کے سابق ممبر شیخ محسن رشید نے انجام دیئے۔

اس موقع پر فاؤنڈرز گروپ کی جانب سے کارپوریٹ کلاس کے امیدواروں میاں محمدامتیازاحمد‘ چوہدری جاویدارشد‘ چوہدری جاویداقبال‘ چوہدری عبدالصمد‘ چوہدری شاہجہاں خرم‘ رانا شاہداکرم‘ مبشر احمد‘ ایسوسی ایٹ کلاس کے امیدواروں میاں عبدالسلام‘ میاں آصف محمود‘ چوہدری محمد سعید‘ چوہدری منظوراحمد‘ عبدالوحید بھٹی‘ چوہدری ذوالفقار گل اور میاں ناصر علی کا شرکاء سے تعارف کرایا گیا۔ تقریب میں معروف صنعتکار محمدافضل مہر‘ فاؤنڈرز گروپ کے رہنما میاں بشیراحمد‘ عبدالطیف بھٹی‘ جام شمس الدین کلر‘ چوہدری محمد یٰسین‘ میاں سعیداحمد‘ چوہدری ذوالفقار احمد‘ چوہدری اظہرجمیل‘ چوہدری راشد رفیق‘ ڈاکٹر انعام الحق کے علاوہ بزنس کمیونٹی کی دیگر سرکردہ شخصیات بھی موجود تھیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button
Translate »
Close
Close